黃宗澤（Bosco）同胡杏兒分手之後，近日傳佢搭上無綫小花林穎彤（Bella），不過Bosco斬釘截鐵話冇咁嘅事，目前專心工作。OK喇，Bosco近日就埋首拍無綫新劇《貓屎媽媽》，日前佢同楊愛瑾（Miki）及古明華（古佬）喺九龍灣某屋邨嘅大牌檔拍外景。
新劇左右逢源
劇中Bosco同Miki及岑麗香有感情戲，左右逢源，不過佢大爆古佬先真正艷福不淺：「古佬同羅敏莊有情慾戲！」古佬即澄清：「我哋嗰場情慾戲純搞笑，我拍認真就唔好睇，要拍到觀眾睇完覺得好笑。」Bosco同Bella傳緋聞，同Miki合作會唔會避忌啲？Bosco笑住話：「所以要保持距離，不如傳我同古佬一齊啦！」
已經28歲嘅Miki要扮18歲青春少女，造型娘爆，劇情講佢有個3歲囝囝，佢將囝囝交畀Bosco，古佬爆料話：「佢拋夫棄子，靚女通常係咁，睇佢造型就知入型入格。」Miki即自嘲話：「好彩我唔靚，今日場戲回憶番我18歲時將個仔交畀Bosco，自己都冇諗過會做阿媽角色。」Cookies出身嘅Miki首日開工，佢話感覺唔錯：「有兩個猛男同我做對手好開心呀！我當學吓嘢，電視我係新丁，希望攞多啲經驗，同佢哋學吓點做戲，我戲份唔多，都係拍幾日。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！