康宏理財（1019)上月入股詠春師傅冼國林旗下第一信用（8215），成為第二大股東，一向鬼馬嘅康宏主席王利民（Quincy）竟然因為去咗北極跑馬拉松，未見過冼師傅，但就好希望同對方喺電影方面有合作，唔係合作出品電影，而係喺冼師傅計劃開拍嘅新片《黃飛鴻》飾演一角，做牙擦蘇都得喎！
財經界人士走進大銀幕並非新鮮事，SOHO中國（410）老闆潘石屹就試過主演內地電影《阿司匹林》，佢太太張欣仲威水，一係唔拍，一拍就係荷李活製作嘅《Wall Street》，雖然只係客串，但係同男主角沙拉保夫有對手戲，令人好有印象。
望冼師傅開戲預埋佢
Quincy噚日出席康宏20周年誌慶時，大爆冼師傅做完《葉問—─終極一戰》出品人之後，準備開拍《黃飛鴻》，佢想伺機搵番個角色來做喎，只係唔知道冼師傅會否嫌佢「骨格離奇」，唔係拍動作片嘅材料啫。
講到做戲，見佢平時講嘢動作多多，就知佢對住鏡頭冇難度，佢噚日又講北極跑馬拉松，指其間身體不適要停低唞唞，一停低就不得了，「凍到好似塗咗收縮水咁」，佢仲即席表現塗咗收縮水係點，當時佢個樣似足《精裝追女仔》入面嘅馮淬帆。
不過，孖屐始終最想知佢間康宏同第一信用合作之後搞乜囉，咪成日古靈精怪先得㗎。
李華華
mailto:[email protected]