羅仲謙、連詩雅（Shiga）、𡃁模許穎（Phoebe）同師妹梁晶晶（Bonnie）等，噚日喺灣仔出席防曬用品活動，謙仔喺台上同連詩雅互搽防曬，佢好穩陣只搽女方膊頭，不過就捽咗好耐畀記者影相。謙仔話唔敢行泳褲騷，行就要做好多準備，問係咪要攝嘢加料？謙仔笑笑口話：「要睇吓有冇走光，或者加條沙灘褲喺外面。」
近日張家輝操到好fit，謙仔話自己都keep到7嚿腹肌，問腹肌係咪最吸引女友楊怡？佢有啲尷尬話：「男士最吸引應該係對女仔好。」
許穎撐師妹奪愛
Bonnie最近同柯震東喺台灣夜蒲，佢話大家係好朋友，識咗年幾，問佢知唔知對方有女友蕭亞軒？Bonnie扮儍話：「唔知，佢冇講過，我哋未到發展階段。」Phoebe鼓勵Bonnie鍾意就自己爭取。
另外，連詩雅日前接受商台錄音訪問，透露拍拖最耐一次係3年，最短一次係幾個月。Shiga承認自己讀書時比較鍾意去蒲，反而入行後就少咗好多。佢仲自爆拍拖時有異性冇人性，成日掛住陪男友而失去好重要嘅朋友。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！