馬賽近期喺唔少劇集都擔好重戲份，而且表現越嚟越勇猛㖭！好似佢噚日拍無綫新劇《巾幗梟雄之諜血長天》，睇見馬賽咬住一張相，喺一幢舊樓嘅騎樓，着住條裙，擘晒腳爬出騎樓，沿住條長布爬落地下，完全唔顧港姐儀態，證明佢已經豁咗出去，誓要洗脫喺《神探高倫布》嘅「娃娃」污名。
替身幫手
事後馬賽喺電話度話，雖然睇落好似好危險，不過公司一早預備好替身，又有武指喺下面扯住條裙，兼且仲搭咗好多層高嘅紙盒，所以好安全。馬賽仲話：「初初有諗過自己試晒全場戲，做到盡量自己做，但係跳落嚟掹住條繩唔夠力，所以要替身幫手。」
馬賽又話：「𠵱家拍咗好多動作戲，呢套又有啲爆破同吊威吔嘅場面，慢慢我覺得自己大膽咗，武指佢哋話我下次可以自己試，仲叫我再操弗啲，下次可以過去幫佢哋手。」呢套劇喺香港嘅戲份差唔多拍晒，大隊喺下月中會去內地繼續拍，馬賽話唔擔心疫情：「我自己會注意衞生安全，呢部份我嘅戲份唔多，所以有時間會去廣州、佛山啲景點周圍玩，等呢部戲煞科先好好休息。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！