狼振英頭號愛將張震遠因財困辭去所有公職，佢一手提拔嘅陳謬波噚日回應議員質詢時，又自爆狼宅原來仲有個30米地下空間未處理，搞到狼太唐青儀噚日晏晝出席協青社活動時，被記者不斷追問狼振英醜聞。
眼見狼太冇保安隨行，協青社幾個職員化身人牆護送，仲一度捉住記者雙手唔畀追問。狼太聽到咁嘅提問，當然變身聾耳陳，入場時全程封嘴兼黑面，直到大合照時先勉強唧出笑容咋。查實噚日追問狼太嘅記者唔多，但協青社就總動員攔截；總幹事李文烈平時最叻捉邊青，估唔到攔記者仲叻。其實政界中人俾記者追訪好平常，何必咁大陣仗？