球迷喺下季法甲，隨時將升班馬摩納哥認錯做波圖。點解會咁？因為摩納哥豪使逾億歐元，係咁簽啲現役同前度波圖球員返嚟；而佢哋最新贒中嘅，就係𠵱家踢緊俄超辛尼特嘅巴西前鋒侯克。
簽法卡奧好事近
摩納哥有俄羅斯億萬富豪列保洛夫利夫撐腰，買人完全唔使睇價錢，上周五就以天價7,000萬歐元（約7億港元），喺波圖簽入葡萄牙中場摩天奴同哥倫比亞中場占士洛迪古斯。之後，佢哋雖然轉向西甲班兵，但擸嘅都係前波圖兵、今夏同皇家馬德里約滿嘅葡萄牙中堅卡維奴，雙方仲已經簽約1年。卡維奴喺簽約後話：「法甲係個好刺激嘅聯賽。我好高興可以加盟摩納哥，對我嚟講係一次新挑戰。」
與此同時，摩納哥喺收購馬德里體育會嘅哥倫比亞前鋒法卡奧一事上，亦接近成事階段，轉會費為6,000萬歐元。之前幫波圖贏過葡超同歐霸盃嘅法卡奧就咁講：「我呢兩年喺馬體會過得好開心。我冇諗過咁短時間就贏到3個錦標，簡直就好似發夢一樣。」
或6億斟侯克
唔好以為摩納哥嘅波圖化計劃就咁會結束，其實仲陸續有嚟至真。侯克嘅經理人方錫卡日前證實，摩納哥想將侯克帶去法國。方錫卡話：「我識得摩納哥啲高層。現階段摩納哥仲未接觸我，但盛傳佢哋想簽侯克嘅消息，就係千真萬確。」侯克喺舊年9月由波圖，以6,000萬歐元（約6億港元）轉投辛尼特，不過因為同教練史巴列堤唔妥，所以一直想走；如果摩納哥肯出6,000萬歐元簽佢，佢同辛尼特都肯定一口應承。
摩納哥狂簽波圖兵，實力肯定大增，所以佢哋對贏咗今季法甲嘅富豪球會巴黎聖日耳門嚟講，肯定係一大威脅。站喺球迷立場，法甲有兩支星光熠熠嘅球隊，一定係好事囉。