球季結束，一班球星都得到休息時間。有啲去度假享受陽光與海灘，亦有球星選擇陪吓屋企人，見吓啲小朋友，所以近日facebook、twitter、instagram等社交網站，都見到唔少球星小朋友相；平日喺球場再凶神惡煞都好，都突然變得和藹可親。
NBA火箭因為喺西岸首圈出局，一班球員提早放暑假；林書豪早前去咗夏威夷度假，不過依然同兩位小朋友skype。雖然唔知呢兩位小朋友係J.Lin阿哥嘅女，定係親朋戚友嘅小朋友，但睇得出佢哋玩得好開心，仲伸脷扮鬼扮馬。
而佢隊友柏臣斯都去咗陪屋企人，仲抱起外甥，玩得勁high㖭。
朗尼囝囝感情好
曼聯前鋒朗尼早前再度添丁，Kai仔多咗個細佬，都冇因為少咗父母注意而唔開心，仲不停同Klay仔玩。日前朗尼太座高蓮就喺面書放咗張朗尼抱住細仔，畀Kai仔可以哄埋睇真啲細佬咩樣嘅相。兩兄弟咁和睦，未來一定係好好感情，隨時兄弟班踢波，勁過《足球小將》嘅立花兄弟！
利物浦中場盧卡斯個仔柏度，唔經唔覺已經兩歲，人仔細細好鬼得意；日前盧卡斯喺屋企同朋友食飯，柏度仔仲企定定影相，含住隻匙羹個樣真係勁可愛！
亦有球員直接將小朋友紋上身，阿仙奴中場辛迪卡索拉，就將剛出世嘅囡囡India個名紋上手臂，愛女愛到上晒身！
