唔少立法會議員最近竊竊私語，話自由黨黨魁田少又「換畫」嘞，仲不避嫌帶「新歡」去立法會「招搖」，唔少男同事睇見，羨慕之餘都驚嘆田少新歡好猛料。唔好誤會呀，田少嘅新歡查實係價值440萬嘅458 Spider法拉利；田太對新歡都好包容，經常陪住田少一齊遊車河吹吹風。
舊年先出產嘅458 Spider，電動硬摺頂係賣點，田少都話好鍾意呢個硬頂開篷，更大讚新車不但依舊有570匹馬力；由時速0公里加速到100公里，3.4秒就得，真係要去即去、要停即停，好啱佢呢個年紀揸，事關一旦遇上危險，部車反應快啲、分分鐘救番自己一命喎。仲話新車比佢上一部法拉利430更易揸，因為好多嘢自動化咗。
價值高過問責局長年薪
新車價值440萬，高過問責局長一年近400萬人工，又難怪田少唔太將班局長放在眼內。田少話佢買車向來一炮過畀錢，唔會分期；78年、即佢31歲至今，大約買過六、七部法拉利啦。
大拿拿放成400幾萬喺立法會停車場，同事眼甘甘，田少則唔多擔心。雖然好想載個孫去吹吹風，但因為仔女擔心小朋友坐法拉利太危險，因此已向田少下禁令，有幸做乘客嘅，都係田太囉。大家想𥄫𥄫呢部車都唔易㗎，因為佢只會用呢架車往返山頂屋企、立法會、灣仔辦公室同深水灣之間，去新界東落區，梗係坐番司機揸嘅實用車。
mailto:[email protected]