政權中國、文化中國、人民中國，你心目中的中國又是甚麼呢？是五星旗、龍獅旗、青天白日旗，還是一片空白茫然呢？過去24年來，把香港人覆蓋在同一天空下的平反六四訴求，因為「愛國」一詞而突然瓦解，一代人看成家鄉的土地，變成另一代人眼中的蝗蟲窩。
有學者表示愛國主義本身沒有好壞，香港社會在過去10年處於思想激盪的狀態，是否愛國其實無關宏旨，重要是不要排外和尊重異見。
以往接濟鄉下親戚
在支聯會主席李卓人的心目中，那個可望而不可即的國，是山水情懷，以及魏京生、李一哲對政權批評的大字報，「今日大家睇到嘅可能係強國人，但我睇到嘅仲有民工被剝削、被強搶土地、被官僚欺壓，同埋國內好多非政府組織介入社會，照顧啲無權無勢嘅人」。
中大政治與行政學系高級導師蔡子強以世代作分析框架，他表示上一代人不少都根植內地，戰後才移居到香港，「好多人都自覺係由中國一個地方走難去另一個地方，諗住風波過去之後會返去，到50年代邊境封閉，人口再唔係咁流動，香港人先開始建立嗰種獨立主體意識」。
其後的一代雖然不在內地出生，但仍有不少親人居於內地，「嗰時冇話大國崛起，唔會直接威脅到你，返鄉下接濟親戚有種優越感，揹個擔挑、拎罐花生油，啲親戚會拎個細樽嚟，好開心咁裝走啲油，用膠袋裝啲白兔糖、煙仔餅，令人有空間去發揮善良本性同埋孕育同情心」。
如今與內地人競爭
至近年中港融合加劇，內地人不再是關愛對象，而是競爭對手，「嚟搶學位、搶奶粉、搶飯碗，咁仲講乜嘢同情呢？媒體比起六、七十年代發達，中國新聞比例好重，少咗啲幻想」。
嶺大文化研究系助理講師葉蔭聰認為愛國主義本身沒有好壞，「最重要係唔好排外、唔好有專制思想、壓制異見，只要係重視平等關係、反專制，就唔係壞事」。
葉蔭聰指香港自2003年至今，一直處於思想激盪的狀態，政治再不是民主派和保皇派之分，無論是香港本位，還是熱愛祖國，都有共存和互相刺激的空間。
六四24年，我們不想記起，但未敢忘記。
蘋果六四專頁： http://6471.appledaily.com/