近日網上流傳一段海洋公園海豚Pinky撼頭埋牆片段，疑似自殘，其後園方解畫，指此舉乃Pinky自小的「慣常獨特動作」。
姑勿論海豚是否因表演頻繁導致壓力爆煲，一時「諗埋一邊」，繼而「撼埋一邊」，每條海豚的確各有性格，有海洋公園海豚訓練員指，牠們不止有脾氣，而且蠱惑過陳浩南。 記者：潘婉玲 攝影：胡智堅、劉啟文
「佢哋每條都有唔同性格！」伍嘉慧說。她任職海豚訓練員六年，目前於海洋哺乳動物繁殖及研究中心工作，把裏面的10條海豚視如己出，包括疑似「睇唔開」的14歲海豚Pinky。
蠱惑恰新訓練員 忌偏心
她承認，照顧海豚的情緒大有學問，「佢哋同人一樣會發脾氣，我哋會喺佢哋發脾氣前先解決問題，假設佢哋三隻鍾意玩波，我哋唔會擺一個波落去，因為一定會搶」。此外，陌生海豚一旦入侵地盤，會影響同類情緒，果然有「人性」。
伍嘉慧英文名Angela，有隻海豚媽媽叫Angel，其子則叫Angelo，一家三口樂也融融，但絕不能因此偏心這對母子，「我哋唔可以偏心，因為佢哋感覺到，不過某幾隻會夾啲，因為合作耐啲，好似Angelo，今年兩歲，係我由細湊㗎」。說時一臉滿足，像跟記者介紹她的乖仔。
訓練員規定海豚跳躍高度，然而海豚智商甚高，Angela不諱言，牠們都是古惑仔，對這個高度「可加可減」，「當有新訓練員加入，海豚自己會降低標準，試探吓，例如跳得低少少，睇吓呢個訓練員好唔好恰」。
放洋英國 唔做OL寧執屎
Angela愛好水上活動，早已考獲潛水牌照，六年前於英國取得工商管理學位後回港當OL，但試問辦公室怎困得住飛魚，半年後加入海洋公園當上海豚訓練員，「第一次落水就係同Angel，突然有一刻恐懼，發覺佢大隻過你，高過你」。訓練員的職責還包括日常身體檢查，堂堂留英大學生竟然清理海豚糞便，「有人問我，大學畢業，點解要入嚟擦地？但既然照顧得佢哋，就連衞生都要照顧埋」。
去年暑假，園方因加開海洋劇場表演場次，遭外界痛斥勞役海豚，Angela坦言難受，「惟有努力話俾人知，我哋係好用心去照顧佢哋」。
她剛踏入女人30大限，但不心急結婚生子，更稱對着這10條「仔女」開心過照顧「人仔」，「人個腦好複雜，太多計算！但動物好簡單，鍾意就會喺你面前，唔鍾意就走」。
阿Sir轉行玩雀學教仔
萬一自殺風氣傳染海洋公園別的動物怎辦？幸好園內另一邊有個前度阿Sir坐鎮。
問題多變 靠臨時執生
六年前Jason陳志龍脫下警察制服，照顧雀仔，記者原本推斷，這大抵是前線警員壓力爆煲逃亡的又一例子，沒想到理由卻反高潮，「我好鍾意動物」。養過鸚鵡、白鴿、貓、狗、兔，舊居猶如動物園。
今天的工作跟過住異中有同，「同警隊一樣，呢度都好講teamwork，紀律部隊嘅工作冇綵排，𠵱家雖然有綵排，但遇到嘅問題、環境每日都唔同，我哋嘅決定好影響佢哋（雀鳥）嘅安全，要臨時執生」。
當差短短一年多，每天聽從指令，如今發號施令，卻並非如外人想像般過癮。一年多前，一隻禿鷲於表演其間飛走，園方靠其身上的追蹤器，花了三天始尋回，「佢飛咗去南塱山，俾周圍嘅環境，好似纜車、機動遊戲吸引咗，但係雀仔識飛，你綁佢唔住，最終佢識飛返嚟」。此一刻，記者聯想到男女相處之道。
至於這隻禿鷲至今仍如常每天出場表演，「失敗一次，唔代表佢以後唔得，只要俾佢知乜嘢係錯」。32歲的Jason有子一歲，從照顧動物過程中，學習到教育小孩的技巧，「你要話佢聽你想點，佢做錯，可能係我哋冇清楚嘅信息」。這一刻，Jason警察上身。
你想爆?幫你爆!
熱線電話：2990 7225
mailto:[email protected]
WhatsApp：9131 4511