藝人發生交通意外，好多時明明好小事都會俾人放大。好似娥姐商天娥咁，噚日中午12點幾，佢由老公揸住架新落地嘅白色七人車入沙田馬會宿舍接朋友，發生冇傷人嘅輕微碰撞，結果因為對方女司機態度強硬，最後要驚動警察嚟處理。
娥姐噚日喺電話度回應話當時雖然佢一直講緊電話，但都睇住老公一路跟足指示行車，娥姐話：「裏面啲路通常熟人唔多遵守指示點行，但我哋係外行，梗係跟足指示，去到條單程路有車迎面嚟，老公就停喺停車線前，當時老公同寶馬個女司機都停咗兩秒，老公仲將車向左駛靠埋少少，諗住讓對方過，點知佢退後再駛前，結果佢車頭揩花我哋車尾。」
被指知名人士
當時車上仲有幾個親友，加上趕住另一行程，娥姐見只係輕微揩花又冇人受傷，諗住私下和解，點知個寶馬女司機態度強硬，仲指娥姐係知名人士，娥姐老公決定報警，交由警方處理，娥姐話：「又唔係我揸車，唔關我事，乜嘢知名人士啫，我都只係一個平民啫，最緊要都係要遵守交通規則囉！」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！