黃伊汶代理的手錶品牌昨日在中環舉行宣傳活動，圈中好友周慧敏（Vivian）、鄭希怡、何嘉莉及陀住7個月「小春子」的應采兒（丁丁）齊齊撐場，腳踏兩吋高踭鞋的丁丁步履輕盈，她見產後9個月的何嘉莉已收身穿露腰裝，忍不住大讚：「有冇生過㗎你？」上圍明顯升cup的丁丁笑說︰「一向都唔係細，加上肥咗廿磅，但都係靚囉！」
丁丁透露已擇日開刀產子，屆時老公陳小春亦會陪入產房，她說：「我叫佢唔好剪臍帶，淨係喺我附近行吓就OK，佢想參與係好事，仲就嚟唔拍嘢又唔唱歌，拒絕開工。佢話唔想後悔，唔想miss咗呢段時間，但係冇人搵錢喎！仲話我生完，佢又話驚會唔專心工作，聽到想打佢。」她還笑說：「我冇預咗兩個人一齊休息，由我有咗到𠵱家都冇拍戲，最耐係同鄭伊健去澳洲幾日拍特輯，佢叫我去拍嘢，我咪話唔想返嚟個仔同佢一模一樣，跟住佢就話最多唱歌，戲唔拍住，我覺得坐月係女人嘅事，不過佢好似都想坐埋一份。」雖然小春一心想感受每個細節，但丁丁忍不住爆料：「BB好唔畀面，一摸BB就唔郁，搞到佢叫我同BB講，係爸爸搵錢養家㗎！」
黃伊汶計劃結婚
此外，黃伊汶表示未來會專心打理生意，暫別娛樂圈。提到男友陳國坤已求婚，她說︰「係有計劃，但未定幾時。」而Vivian透露專誠來撐好友場，問到會否投資？她說︰「我對數字冷感，曾經試過股票，50幾蚊入，200即賣，後來去到300蚊，所以以後叫老公理財。」
採訪：卓寶花
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！