嚟緊呢個星期，酷熱天氣強勢回歸，喺冇冷氣嘅街市工作嘅商販一定好難捱。幾位立法會議員噚日同食物及衞生局局長高永文巡視三個冇冷氣嘅街市，全港公共街市販商大聯盟在場請願，要求政府為無空調嘅街市安裝冷氣，而上月發生三級火嘅大成街市，百多名販商批評當局懶理災後經營環境，態度令人心寒，要求當局酌情免租。有份視察嘅公民黨毛孟靜話商戶唔介意畀冷氣費，但就希望政府快啲幫佢哋裝冷氣。佢話視察期間，有位賣腐乳嘅伯伯大讚高永文係好醫生，原來呢位伯伯係高永文以前嘅骨科病人，係高永文醫好佢嘅膝蓋，仲話高醫生收費唔貴。