警隊前一哥李明逵97年播貝多芬《第五號交響曲》遮蓋示威者聲音，「名留青史」。呢單嘢，搞到佢畀人投訴，但無損佢嘅仕途，後來仲平步青雲做一哥。
投訴越多，升得越快，好可能係李明逵上位之道。《警聲》最近登咗佢喺2011年出席醫管局員工分享會份講稿，佢當時話自己喺警察部，「幾乎每一級都俾人投訴過」。第一次俾人投訴，係75年喺荃灣做CID時，查一單劫案，俾市民投訴話佢查案不力，冇盡快破案。最後警察查警察之下，認為件案比較複雜，同埋投訴人口供不盡不實，所以投訴不成立。
李明逵當時曾向投訴人講過「你唔好以為警察係神仙，有案必破」，投訴人回敬佢：「如果警察破唔到案，咁點解我哋要報案呢？」唔知𠵱家啲警察，明唔明呢個道理？