港股噚日反彈238點，比預期強，短線就以炒股唔炒市心態入市，最好有把握捉到強勢股先買，其中海隆控股（1623）同殼牌簽訂四年期9,010萬美元陸地鑽探同修井機合同，消息絕對會令股價出現重估，相信後市會跑贏其他油氣設備如股安東油田（3337）同宏華集團（196），今後如果呢個sector保持強勢，海隆只會係強股中嘅強股，咪話唔厲害。
點解呢單新聞咁緊要？因為海隆本身有做外地嘅海油服務，佔舊年整體毛利27%，其餘鑽桿同塗層材料呢啲硬件生產業務穩打穩紥。今次殼牌單嘢就話畀大家聽，佢嘅海油服務唔只穩定增長概念咁簡單，而係收入爆升概念，淨係呢個業務收入幾何級增長，就足以帶動海隆加入增長概念股行列。
如果計算估值，加埋換股債攤薄效應，PE 18倍，就當佢今年至少三分之一毛利來自海油服務，明年升到四、五成，至於安東就幾乎100%做類似業務，但PE高達38倍，實在差太遠。
股價可見5.5元
晉佳認為兩者之間PE可收窄，就算安東股價唔點升，海隆PE都值得升到22倍，股價就可見5.50元。
事實上，油氣設備股前日爆升之後，安東噚日已經平收，但係海隆仲可以升4%，確認佢走勢跑贏安東，相信情況會持續一段時間。
承接上一期，慧聰網（8292）點解係增長概念股？公司主要從事電子商務平台，近年越嚟越多批發商鍾意喺佢度出post賣嘢，今年第一季銷售收入增長42.9%，純利勁升2.8倍至2028萬元人民幣，其中互聯網服務收入增長六成，呢part毛利率仲要非常高，同時收入增長快過行政費用同銷售費用，令盈利幾何級增長。佢年度化市盈率大約30倍，如果照舊年個勢頭，明年PE可能低過15倍。
不過噚日啱啱有單新聞，阿里巴巴主席馬雲牽頭搞物流公司菜鳥網絡，連運輸都做埋，一條龍服務可能就咁打低埋慧聰網，所以長遠都係觀望吓先。
晉佳
本欄逢周一、三及五刊出