全球最恐怖過山車在英國試玩即壞，男同事講起都耍手擰頭，話將條命交畀陌生人，分分鐘提早幫你game over，好唔抵，但炒股佢哋偏偏唔畏高，務求食盡升浪。Samantha玩過山車未驚過，但炒股向來畏高，現實總是殘酷的，唔追嘅結果往往是升多幾支大陽燭，唉！
「高追」最大心理障礙無非怕成為最後一個衝入市嘅羊咩。要數今年的強勢股，智能手機概念股和科網股一定有份，上周有「新仔」加入戰團，就係信義玻璃（868），受到玻璃跌價同產能過剩影響，玻璃股淪為軟腳蟹，信義吼中科技呢嚿肥肉，生產電子玻璃，股價較同業及早逃出生天。
券商齊齊出報告唱好，認為信義可靠呢瓣業務食糊，因為全球識生產呢類玻璃嘅廠商唔多，競爭細，加上電子玻璃毛利率最高達五成，好搵過𠵱家啲業務，雖然管理層話第三季先投產，但炒憧憬都夠殺！同怕失戀唔敢拍拖的道理一樣，與其怕摸頂，不如買入，食盡智能手機熱。
Samantha
本欄逢周三、五刊出