來季英超一定好熱鬧，因為一向語不驚人誓不休嘅領隊荷路威，喺周一就帶領水晶宮喺英冠升班附加賽決賽加時以1:0氣走屈福特，獲得最後一個升班席位；而荷路威喺賽後仲立即發揮「金句王」本色，話會求曼聯新帥莫耶斯繼續將翼鋒韋費特沙夏借畀水晶宮用喎！
「留菲臘斯到50歲！」
水晶宮喺周一嘅附加賽決賽，要戰至加時先憑39歲老將前鋒菲臘斯射入12碼，以1:0擊敗屈福特，成功升上英超兼將會坐收1.45億鎊（約17億港元）嘅收入。雖然喺水晶宮職球員都未行到入更衣室慶祝，英國博彩公司已將佢哋列為下屆英超降班大熱門，賠率得1.62倍，但無阻荷路威嘅興致。佢好興奮咁話：「如果菲臘斯一路入到波，我想佢留隊留到50歲！」
由於荷路威喺2010年夏天曾成功帶領黑池透過附加賽升上英超，而升班後佢兌現承諾，用升班功臣踢英超，結果黑池一季就降班；因此，荷路威喺周一話：「我今次學精咗喇，一定會替球隊擴軍。好似喺季中已賣畀曼聯，然後由曼聯借返畀我哋嘅韋費特沙夏，我就好想留住佢，今場博得12碼都係靠佢。我會求曼聯新帥莫耶斯，借多沙夏一季！」
摩帥高調現身睇波
至於呢場波嘅座上客，仲有摩連奴㖭！摩帥咁高調現身倫敦，令好多人都覺得佢重返車仔已經好事近。據英國《太陽報》報道，今次摩佬回歸車仔，就講明要帶心腹費利亞過檔。37歲嘅費利亞同摩佬喺2001年結緣，當時摩佬執教利亞拿，而佢就係利亞拿嘅體能教練。佢哋兩個不知幾咁投契，摩佬去到邊，都預埋個位畀佢。
