政府六四開售iBond有乜玄機？方便大家容易記？政府冇避忌？
陳家強稱拉布阻住晒
財經事務及庫務局局長陳家強噚日開記者會前應該早有準備，佢俾人一問，即刻一輪嘴咁解釋，指係立法會結束拉布後，佢哋火速籌備兼盡快推售，咁就喺呢日賣喎。
政府2011年7月首次賣iBond，舊年6月5號開售，今年檔期差唔多，點解揀6月4號開賣？局長伺機批評有立法會議員拉布，阻咗好多政府計劃，好在最後關頭，立法會通過增加發債規模去到2,000億，政府先可以盡早將iBond推出畀市民。
政府唔避忌啫，內地網民會否因為網絡審查而睇唔到「六四iBond」呢？經過一輪網上搜查，百度搜尋仲有個「歷史上6月4日有甚麼重大事情」項目，「8964」就被封殺了，六四iBond應該凍過水。