記協45周年晚宴本周五喺金鐘萬豪酒店舉行，擺足44圍，全場爆滿，晚宴特刊封面好特別，係一支筆桿頂住一大嚿頑石，寓意「企硬」呢個主題。記協邀請中大校長沈祖堯做主禮嘉賓，以示新聞自由同學術自由都係港人不容有失嘅橋頭堡。
一直為同志平權發聲嘅藝人黃耀明，會喺記協Ball以聲音力撐新聞自由，相信會惹嚟賓客陣陣尖叫聲；記協又會將《頭條新聞》搬上舞台，太后吳志森同小豪子曾志豪會大駕光臨。而報界殿堂級人物、《信報》創辦人林行止會喺晚宴特刊撰文，分享對傳媒同23條嘅睇法，全文將於記協網站轉載，相當有睇頭。