上星期五早上睇直播立法會帳目委員會「公審」前廉政專員湯顯明，悶到抽筋，講來講去講不出所以然；睇怕主要原因係廉署既已立案正式調查湯顯明，湯先生在律師忠告下，當然係說話盡量小心，雖則話立法會用權力特權法傳召佢，佢在立法會上嘅言詞不可以作為呈堂證供，講就係咁講啫，言詞不小心嘅話，咪自動提供線索俾廉署查自己？總之凡事一經廉署插手，其他人就冇法問得水落石出。
廉署查政治事件十分緩慢，連前刑事檢控專員江樂士都忍受不了，五月二十四日在《南華早報》發表文章，炮轟廉署處理曾蔭權案，遲遲未有結果，對曾蔭權不公道，並引用法律名言"justice delayed is justice denied"，江樂士話如果有調查結果，廉署應該盡快起訴曾蔭權，如果搵唔到證據，就應該銷案，唔好拖拖拉拉。
江樂士所言甚是，近日因張震遠暫停所有公職之事，有人扯到林奮強點解向行政會議告假咁耐，其實林奮強因賣樓之事，被泛民告上廉署，故此林奮強立即向行會告假，等廉署調查澄清，但等到依家，大家不知道廉署做過乜嘢事噃，照計香港地，賣樓買樓，程序簡單，每個環節有文件、有地產代理、有律師涉及，要查林奮強賣樓程序是否違規違法，容乜易呀，查曾蔭權就話灰色地帶太多，且過往特首不受廉署條例管轄，查案比較複雜啫，查簡單樓宇買賣，駛幾個月？如江樂士所言，廉署若有證據，應該起訴林奮強，如無，就應銷案，還他清白。
好彩曾特首已退休，林奮強早已有錢，唔駛搵工啫，如果係五十歲中年人要養妻活兒，遇上同樣情況，一定搵唔到工，搞到精神徬徨。
寫寫吓，收到《亞洲週刊》，內有爆炸性報道，《亞洲週刊》話得到一份北京研究機構的秘密報告，稱為「關於香港廉政公署目前存在的問題」，內容指英國勢力滲透廉署，操控放料，向曾蔭權、湯顯明、中聯辦串連在一起潑污水，將廉署內部秘密定點精準引爆，向傳媒餵料！咦，《亞洲週刊》姊妹報《明報》最多「湯顯明案」料爆喎，《亞洲週刊》唔知有冇向《明報》查詢過呢？北京一旦定性廉署為英國特務勢力影響範圍，香港多事矣！