「我最想住嘅地方」原來唔止瓦魯瓦圖，民企新股和諧汽車（3836），佢老闆馮長革嘅國籍係大家好少聽見嘅聖基茨和尼維斯（St.Kitts and Nevis），呢個島國位於中美洲加勒比海地區，係前英國殖民地，1983年獨立。台灣藝人大S奶奶，即係俏江南董事長張蘭都係呢個國籍。
小島人口九成黑人
聖基茨和尼維斯舊年開始成為中國人其中一個移民熱點，呢度人口約五萬人，九成係黑人。其中一個吸引之處，係呢度唔要求投資移民住喺當地，接受申請，會將護照寄畀申請人。要做投資移民，最簡單係捐錢，約200萬搞掂。馮長革喺招股書寫上嘅地址位於鄭州市，應該都係呢種投資移民。