女人決心變靚真係話咁易。總市值超過200億元（人民幣．下同）嘅新希望六和，新話事人劉暢一改以往娘味甚濃嘅短髮女強人look，話晒只得33歲，留番一頭烏黑秀髮，薄施脂粉，配上一襲黃色Chanel套裝裙，頓時變番時尚女性。
劉暢外表娟好，有內地傳媒就爆料，指佢細個曾經發歌星夢，但過唔到爸爸劉永好嗰關，最後不了了之。相信若果佢以家陣呢個造型殺入樂壇，肯定大把唱片公司排住隊簽佢。
曾發歌星夢
除咗發明星夢，劉暢同好多女士一樣都係時裝迷，又想創業，劉永好咁錫呢位獨生女，2004年揼本150萬元，畀佢喺成都開舖，一嘗做時裝店老闆娘嘅滋味，可惜最終因經營不善，執笠收場。就因為呢段失敗經歷，令佢決心學好企業管理，又開始幫爸爸打理業務，即管睇佢能否帶到新希望畀股民。