【銅鑼灣】現年37歲嘅盛女舒淇情路崎嶇，苦戀黎明多年最終分手收場，先後轉投王力宏同馮德倫懷抱又無疾而終，冇拖拍嘅舒淇，連拍緊嘅台灣導演侯孝賢新戲《聶隱娘》都未復工，百無聊賴惟有搵助手陪佢打發時間。
睇睡房用品
大前日下晝4點半，舒淇同一男一女助手喺銅鑼灣利園出現，佢哋入咗Cova嘆high tea，hea足一粒鐘先至走。舒淇喺商場不停玩手機，等男助手埋單出嚟後，一行三人又行去禮頓道傢俬舖睇睡房用品，舒淇入到舖頭同兩個助手有商有量慢慢睇，不過冇收穫，之後佢哋又去咗恩平道Zoe西餅店，估唔到佢哋嘆完high tea冇耐，轉頭又坐低食蛋糕，約5分鐘後女助手先離去，剩低舒淇同男助手撐枱腳，兩人有講有笑傾咗成粒鐘才走人。
《聶隱娘》後日就喺北京續拍，舒淇同阮經天（小天）都收到通告要埋位，之前小天喺「台灣大賽車（TSF）2013」嘅超級跑車組分組攞咗冠軍，本來日前要參加第2站賽事，不過小天被要求休息調養狀態，只好放棄心愛嘅賽車。
採訪、攝影：徐錦池
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！