日本動畫《進擊的巨人》因內容令人聯想到中港矛盾，輕易成為報紙A1頭條。查實比喻呢家嘢，真係點演繹都得，有中環人甚至話係講日本經濟。
故事講述世界突然出現巨人捕食人類，逼使人類築起三重圍牆，喺隔絕嘅生活圈中享受百年表面上的平靜。
所謂巨人實際係美國，85年美國逼日圓升值，引發日本資產泡沫爆破，經濟「迷失十年」，長期通縮更令日本經濟自我封閉。情況有如動畫中嘅人類，為求自保惟有與世隔絕。其間日本除咗靠自己，亦有Sony、Sharp呢類巨企對外輸出電子產品（動畫中嘅圍牆）保住經濟。
好景不常，圍牆最終被巨人打破，主角親睹母親被噬，決定反擊拯救人類。就好似蘋果、三星崛起，令日本電子業沒落，連最後的經濟護身符都失去，所以今日嘅日本，一係反擊，一係死路一條。
查實睇動畫都係想relax，過份解讀似乎有失原意，到底有冇暗喻其實唔重要，反正認真便輸了。
Fifi
本欄逢周二、四刊出