民建聯家庭事務委員會啱啱轉咗莊，由深水埗區議員鄭泳舜（Vincent）做主席，噚日佢搞傳媒茶敍講吓家庭友善政策建議。Vincent係藝人胡杏兒嘅姐夫，同太太胡可兒育有三個囝囝，佢話香港好多父母俾人標籤做怪獸家長，其實都係太緊張，擔心子女輸在起跑線上，事實上近年出生率高咗，要爭入好學校都唔係易事。
佢大呻最近為孻仔搵幼稚園真係頭都大埋：「搵晒成個深水埗都搵唔到！」最後搵到間心儀幼稚園，一個月學費竟然近4,000蚊，仲要未包書簿雜費㖭。查實Vincent老竇係保良局主席鄭錦鐘，家底有番咁上下；幾千蚊學費，濕濕碎啦。