德甲漢堡中場雲達華治，自從同老婆施維雅分居、搭上荷蘭國家隊隊友保拿奴斯老婆莎比雅之後，成為咗「國民公敵」。不過，愛情令人盲目，佢同莎比雅唔理世俗人眼光，依舊打得火熱。日前佢兩個仲帶埋雲達華治個仔Damian，去酒店食飯，真係慌死人哋見到唔覺得眼冤。
打完老婆嗒人妻
雲達華治上年喺新年倒數派對，同施維雅吵大鑊，仲出手打人！雖然前者為家暴事件公開道歉，但係就挽救唔到呢段婚姻，施維雅今年1月初承認二人已經分居。早前4月雲達華治公開同莎比雅拍拖，荷蘭國民即時譁然同狂插！同保拿奴斯分居嘅莎比雅話佢兩個喺雲達華治兩公婆分開之後，先喺埋一齊，所以就話施維雅唔會嬲。嘩，雖然分咗居，莎比雅都仲算係人妻，點可以講埋呢啲咁不知廉恥嘅說話？唔好以為自己係施維雅老友就大晒喎！
追蹤人數破百萬
雖然俾全國人民狂插，但係雲達華治同莎比雅依然愛得如火如荼，周日仲帶埋前者同施維雅嘅愛情結晶品Damian，去咗阿姆斯特丹一間酒店食飯，三人一齊影相留念。Damian𠵱家得7歲，仲細唔懂事，見有相機影相，第一反應梗係擺甫士啦。周一朝早雲達華治起身發現twitter追蹤人數突破100萬，仲好風騷咁豎起手指公多謝球迷。施維雅𠵱家點冇人知，佢1月之後就冇再玩twitter啦。