備受敬重的億萬富豪（殊不容易），亦為紐約市長的彭博早前在一電台節目，就美國青年就業發表意見，提出念大學可能徒費高昂學費和四年時間成本，尚會孭落一身債（其實貴為總統的奧巴馬咪係九年前才悉數清還學債），畢業亦未可確保將來就業能享相符的經濟效益。若然是資質平庸，成績一般的高中生，倒不如學師做水喉匠（我腦海即浮現詹Sir版的渠王）更為實際。起碼水喉匠的工作只能「現場實地」進行，不受工序外判影響，亦沒有機會被電腦取替。
他又同時指出，水喉匠的薪酬待遇比起不少學位持有人更佳。據其資料顯示，美國水喉匠的平均年薪可達5萬美元，即係39萬港元，而該國大學畢業生最新的年均收入亦只35萬港元。
至於本港大學畢業生，去年年薪約為18.5萬港元，而持牌水喉匠的人工，肯定唔只呢個價錢，皆因這幾天家渠因連場大雨出現淤塞，要勞煩師傅上嚟通渠，真金白銀清楚得很。
學位貶值 無助青年就業
「學歷與收入不相稱」已成普遍現象，市長那番儼如宣告「學位無用」的言論，不過是實話實說，惹起眾議只因觸動年輕一代，或所謂「貧窮新一代」的痛處。
先進社會的高等教育政策早見量化寬鬆，大學生供過於求、「人才」過剩，而本土職位更因全球化不斷流失到經營成本較低的發展國，往昔驕子光環不在，叫價自然不起。
一紙文憑縱可換取「滴滴尼」社會樂園的入場券，往往只能淪為卡通人偶、總務（即係清潔工或打雜）等閒角，向上流動乏力，前途似「咁」，讀過吓書的咪又係成了社會另一待爆炸彈。
「職業無分貴賤」以前本是用以安慰那些讀唔成或讀唔起書、迫於無奈要投身藍領勞動，惟靠「食力」方可維生的上輩青年。不過今日卻更適合贈予嗰啲莘莘學子，一心以為受過高等教育，就能搵到份「食腦」筍工，再保生活無憂，惜這想法已經不合時宜。
殘酷嘅現實係，「讀得書多」只是意味「讀得書」嘅人真係「多」咗好多，乜士物士通街都係，都未使計埋啲乜嘢副學士。過往高學歷的競爭優勢，有減無增，而大學生搵唔到工，又或不肯「屈就」的比比皆是。
若然大學畢業生都願做「水喉匠」，咁點會輪到啲高中生呢？不過面對經濟轉型、社會變遷，生活在直升機家長無微不至護蔭下的新生代，根本就沒做好心理調節，去接受今非昔比的入息和工作條件，或者紆尊降貴做份「粗重工」。
再咁落去，最後咪就連返轉頭想做「水喉佬」都冇行囉。其時怨氣再聚，戾氣遂生，若論對社會安定造成威脅，伺機破壞「河蟹」，幾時輪到「佔中」。
盧先亞