上個禮拜尾，日本嗰邊忽然跌千點，港股亦應聲下跌。咁日本個股市散晒，係因為佢哋嘅長年期債息升。大家如果記得對上幾年啲歐豬危機，西班牙、意大利等國家嘅10年期國債，去到7厘就俾人話係危機。
咁你估上個禮拜日本10年國債升到幾多厘引發小股災？7厘？錯！係升到1厘。日本國債係GDP嘅兩倍半、政府稅收嘅廿幾倍。之前就算係零厘，日政府都用咗四分之一嘅稅收去畀息。記住，只係畀息，唔係還款。
譚木匠做梳吃香
冇得還，又要㩒低息率，惟有印銀紙。一印，全球就跟住你印，所有資產升值。咁生存之道得一個，就係搵好嘢買保值。幾個禮拜前，我為大家推介過安莉芳（1388），由第一日講至今有兩成升幅，當時連升六日，最多升三成幾。
其實今年孫柏文嗰啲叫大家「一注獨贏」嘅建議，差不多全部都係與女人錢有關。安莉芳——胸圍；阿信屋CEC（759）——零食；沽Yen——港女至愛日本玩。
咁今日，推介一隻做木梳嘅公司，叫譚木匠（837）。啲木造梳、化妝盒等，都係啲女人用嘅嘢，我走去做非正式調查，冇個男人識。呢隻譚木匠喺2009年上市，亦係嗰年咁多隻上市股份中，首日升幅之王。公司業務可能因為易明，所以上市時市盈率好高。到今日，盈利雖然升咗四倍，股價比第一日嘅收市價升咗冇一倍。
大家可能冇聽過呢間公司，因為呢幾年比較低調，不過佢啲產品例如木梳好勁。咁佢點低調？過去兩年成個壹傳媒（282）咁多刊物，得三篇報道。佢啲產品點勁？嗰三篇報道中，有兩篇係「生活版」教啲姊妹用佢啲梳梳頭髮，對個頭殼有幾好。而其餘一篇，就係本版報道佢哋盈喜。我睇好，我下篇喺禮拜四再講佢最勁嘅地方，佢盤數！噚日佢股息除淨，跌幅少過派息，𠵱家唔推介，就會追唔切！
孫柏文
獨立股評人
http://facebook.com/shuen
本欄逢周二、四刊出