今年股市主調，齋睇噚日個市已一目了然：科網、手機設備、節能環保、頁岩氣及醫藥股，全面步入牛三。熱錢跟紅頂白，瘋炒呢幾個板塊；機械、內房、資源、航運股就弱到暈。有戰友笑言：破頂唔追就繼續升，撈底就越撈越見鬼，可謂相當貼切。要破除心魔不畏高，今年先搵到食。
魏力講過，在報價機上的PE已成過去，炒股是炒前景，當歷史PE成40幾50倍都繼續狂炒，多數反映未來增長會好勁。以百勤油服（2178）為例，去年盈利1.8億銀，按年增長105%，每股盈利23仙，相當於27倍歷史PE，睇落好貴。不過，據券商綜合預期，今明兩年純利分別仍有45%及30%增長。計計數，今年預測PE只係18倍，相對於安東油田（3337）的28倍，邊度算貴？
講番業務，集團主攻高端油田服務及設備銷售，包括非常規油氣的致密氣及頁岩氣，於中國民營企業中排第三，市佔率8.6%。百勤與中石化（386）關係良好，去年就鄂爾多斯盆地的三個階段招標總數120口井，百勤中標40口，中標率為三分之一。今年1月，百勤又與華電集團初定策略聯盟框架協議。以其龍頭江湖地位，預測PE去到24倍絕不為過，目標可見8元。
魏力
http://www.facebook.com/2012jason
本欄逢周一、二、四、五刊出