一年，話咁快就過咗咯。八方好記得，舊年5月舉行嘅記協Ball，由張震遠做主席嘅市建局買咗兩張枱捧場，貴為梁振英身邊紅人嘅佢仲喺場內滿場飛；時移世易，財困嘅張震遠，今年冇再喺記協Ball買枱咯，佢冇影之時，唔少唐營組織如田少揸旗嘅自由黨、經民聯嘅林健鋒同林建岳卻熱烈捧場，風水輪流轉，係咪咁解？
唐唐捐美酒贈興
記協Ball今個星期五喺金鐘萬豪酒店舉行，今年嘅主禮嘉賓係中文大學校長沈祖堯，同舊年包致金相比，似乎跌咗watt喎。
至於今年嘅買枱情況，據知就唔算非常熱烈嘞，至少舊年以市建局名義買咗兩張枱嘅張震遠，今年冇再買枱，換言之唔會亮相，只係喺記協場刊登廣告。
有心水清者記得，貴為特首身邊紅人嘅張震遠上年喺記協Ball滿場飛，都幾受在場人士歡迎，其間身為主持人嘅柳俊江仲即場揼佢心口捐5萬蚊，佢都笑住冇say no。唔知係咪預料踏入多事之秋，抑或真係莫財，兼怕再被即席募捐？張震遠或市建局今年都唔買枱咯，反而唐營肯科水畀記協嘅組織就好多。邊個喺特首選舉後笑到最尾？唔使講嘞啩。
據聞今年個Ball唔會有官員表演、亦唔會有記者唱歌，咁查實有乜嘢吸引力呢？記協中人就賣關子，只肯透露會有曾志豪棟篤笑喎。八方聽聞，唐唐繼續捐出珍藏美酒供來賓享用；至於狼振英，冇請佢喎！
mailto:[email protected]