新鮮出爐歐洲冠軍拜仁慕尼黑，喺星期日返到德國，梗係受到英雄式歡迎啦！至於喺決賽落敗嘅多蒙特，亦同樣返咗老家，而佢哋雖然只得亞軍，但都有匆匆去到主場西格納伊度納公園球場，同球迷慶祝今屆成就。
列貝利獎盃同床
拜仁喺上周六嘅歐聯決賽以2:1擊敗多蒙特之後，職球員喺倫敦嘅Grosvenor House Hotel開P開到清晨5、6點。之後瞓咗陣就出發返德；可能人逢喜事精神爽，拜仁返到德國時個個鬼咁精神，好似攞住獎盃落機嘅教練希歷基斯同拿姆咁，就紅光滿面，而其中喺決賽射入決定勝入球嘅洛賓，就有幸攞住個歐聯獎盃步出機場㖭。不過可以喺之前一晚同歐聯獎盃瞓嘅，就係洛賓嘅拍檔列貝利。呢名法國國腳話：「我最開心嘅係可以攬住個盃同老婆一齊瞓。」
至於68歲嘅希歷基斯喺協助拜仁捧盃後，退休大計亦好可能押後，佢嘅經理人雷耶斯話，只要皇家開到聲，希歷基斯係願意返皇馬掌帥，雷耶斯仲強調：「希歷基斯係喺德甲退休啫。」
羅拔仔經理人寸爆
成王敗寇，落敗嘅多蒙特雖然喺英國出發返德國時，佢哋嘅贊助商puma特登搵咗一班快閃黨唱歌歡送佢哋，但球員都冇乜心機，不過好彩仲好有風度，識得拍吓掌。至於當多蒙特返到德國後，就即時去到主場西格納伊度納公園球場，與球迷同樂。難得球迷好熱情，如果唔係睇到球員個個笑容牽強，仲以為捧走歐聯嘅係蜜蜂兵㖭！
不過，一班蜜蜂球迷所擔心嘅事，相信好快成真，就係隊中射手羅拔利雲度夫斯基會同隊友馬里奧葛斯一樣，過檔拜仁。因為羅拔仔嘅經理人古查斯基話：「羅拔會喺呢個夏天過檔拜仁，根本冇必要話佢唔會走。」