正當「梁粉」張震遠檔商交所處於水深火熱之中，買起倫敦金屬交易所（LME）嘅港交所（388）就積極籌備，力谷商品市場。港交所CEO李小加噚日喺網誌撰文大講發展藍圖，又宣佈下月底首次在港舉行LME亞洲年會。聽聞屆時至少有800位來自中外嘅商品交易商同參與者來港聚首。
網誌稱興奮不已
李小加喺網誌披露，家陣港交所同LME上下都為呢個LME亞洲年會「興奮不已」，為迎接呢個盛事，未來幾星期，佢仲會寫一系列嘅商品專題。唉，商交所上下憂心不已，港交所就興奮不已，攞景定贈興？
小加總裁又提到，「對香港而言，商品衍生品交易或許仍是新鮮事物，要發展成功的商品業務更是一項巨大挑戰。」佢係咪見到商交所開業兩年慘淡收場，有感而發？還是寸緊張震遠低估箇中難度？
至少800人出席
LME亞洲年會其實源自LME WEEK，後者係LME舉行咗幾十年嘅傳統盛會，每年十月喺倫敦舉行，聽聞一般有2,400人參與。
LME亞洲年會6月24號起一個星期在灣仔會展舉行，25號由財經事務及庫務局局長陳家強主持開幕禮，大連同鄭州商品交易所理事長又應承擔任論壇嘉賓；當晚晚宴已經賣出80圍，至少有800人到場，主要係中外交易商同佢哋嘅客戶。成件事似乎好有睇頭，資金雄厚咪有呢個優勢囉。
LME亞洲年會部份嘉賓名單
鄭州商品交易所理事長 張 凡
大連商品交易所理事長 張興強
中國期貨業協會會長 劉志超
江西銅(358)董事長 李保民
大冶有色董事長 張 麟
李華華
mailto:[email protected]