內需股神話破滅，體育股、百貨股、服裝股通通都唔掂，本欄上星期已寫過百盛（3368）價殘勿沾手，該股繼續毫無起色。今期就到達芙妮 （210）。大和4月中先維持達芙妮「跑贏大市」評級，𠵱家就狠心削目標價四成至6.60元。點解一個月後就轉晒軚？咪就係達芙妮根本未走出谷底囉！
大和轉軚 降級劈價
該行更力數達芙妮：（一）內地女裝鞋市場積弱，預計達芙妮4、5月同店銷售增長會差過首季，決定將全年預測削半；（二）減價戰沒完沒了，毛利率想升都難；（三）工資、租金齊齊升，成本壓力百上加斤，所以大和決定削減今後三年盈利預測17%至22%，估計今年盈利仲會倒退7%。
但相對同業百麗（1880），大和就覺得達芙妮情況好少少，長線前景比較正面，所以暫時都只將評級降至「持有」。而根據彭博綜合大行報告，目前建議「買入」同「持有」的比例勢均力敵，大約各佔四成，叫沽貨的反而未夠兩成。
不過，睇睇達芙妮走勢圖，簡直肉酸到嚇死人，由年頭開始捱沽，走勢一浪低於一浪。最近驚見連續15支陰燭，仲要大成交配合跌勢，RSI又未見背馳。該股昨日失守7元關，收6.97元，跌穿保歷加通道底部。如果失守2012年7月約6.50元低位，下一站有機會跌至2011年10月低位6元水平。
瑪姬兒