廉署首任社區關係處處長余黎青萍噚日接受卿姐訪問，大談那些年。原來余太未做廉署前已唔亂收禮物，佢憶述任油麻地民政主任時，有果欄中人送佢三大袋美國布冧，佢即時表明公務在身唔收得，結果激嬲咗對方。當時嘅辦事處位於廟街，招牌紅底白字，似足外國紅燈區，佢仲因此一度俾人嗌「廟街皇后」㖭。
余太好記得當年廉署舉報電話266 366，被諷刺係「面木木，心毒毒」。又好難忘當年有警察俾廉署查得緊，闖入廉署搗亂傷人，逼到港督要特赦，嚴重打擊廉署士氣，余太形容當年同事「流淚眼看流淚眼」。至於湯顯明事件，佢形容十隻手指有長短，希望個人問題唔好影響廉署嘅金漆招牌。