來年巴西世界盃落實回歸三色台，球迷本來滿心歡喜，以為終於回到免費睇世盃的年代；豈料聽埋個尾，先知原來要睇晒所有賽事，都係要喺收費台。
時代不同了，足球以至體育大賽要完全回歸免費，已經不可能。但對球迷來說，一早確定轉播權安排，總好過像上年奧運那樣，開波前一刻都未清楚邊度有得睇。
由於直播時間非黃金時段，不利畸寶台搞睇波party；現在台又可能集中資源爭英超，結果令這屆世盃的轉播權，罕有地一直無人問津，遲至賽前約一年才落實。小弟去年已跟朋友說，這屆世盃轉播權很大機會回歸免費電視，但當時並非預計落戶三色台，而是預計由新增的免費電視頻道取得。假若新台開台成功，希望「迫」觀眾轉台看一看，有甚麼比搶一個世界盃這類全球矚目的盛事來得有效？
可惜政府將說好的新牌照一拖再拖，間接又令三色台得益。真係想問一直「研究」何時發牌的行政會議，為何居然夠膽話上周例會「無議程」？既然咁得閒，點解唔試試解決呢個拖咗近兩年的問題？
近年英超在畸寶台與現在台間轉來轉去，可能球迷都有心理準備要於兩台之間跟着轉，甚至索性裝晒兩邊；豈料三色台收費電視原來都會加入爭奪世盃行列，頓時令球迷大失預算。最慘來屆世盃開賽時間多在凌晨4至6時，場場落酒吧睇看來行不通；唔通香港球迷要睇晒所有波，真係要裝夠3個收費台？都係有啲懷念當年兩個台同時播同一畫面的年代。
方柏翹
now足球評述員