無綫一年一度嘅選美盛事《香港小姐競選》已經展開招募，自從87年嗰屆開始，無綫每年港姐外景都係吸引靚女參加嘅其中一個因素，港姐候選佳麗踏足過嘅外景地點，包括希臘、意大利、英國、法國、加拿大、瑞士等，每年都吸引傳媒隨隊採訪，為咗宣傳呢項盛事，無綫同旅行社合作之餘，亦畀錢贊助部份中籤傳媒嘅部份旅費。
任佳麗自拍宣傳
無綫今年嘅港姐佳麗會去八個地方拍外景，但唔知係咪唔想有損害港姐形象嘅報道出街，聽聞無綫會取消贊助傳媒，但另一方面又怕個活動冇宣傳，所以到時啲佳麗將會每人獲派一部相機，規定佢哋自拍或互拍寫網誌，由以前佳麗禁止自我宣傳，變成可以公然自我宣傳兼幫公司、旅行社宣傳，佳麗之間亦由暗鬥變成明爭！
噚日一班應屆港姐張名雅、朱千雪、同前任港姐馬賽、張嘉兒、許亦妮、何傲兒等，喺銅鑼灣幫《2013香港小姐競選》做招募，其中許亦妮嘅紅色低胸裙最性感，其間成班靚女又同魔術師甄澤權（Louis）玩魔術，又唱歌又跳舞，何傲兒、張名雅、馬賽三個都係着短裙就出事啦，搞到齊齊露底，輪流春光乍洩。
講到全場最性感，許亦妮話唔算，佢反而話自己肥咗想減肥，尤其近排拍劇心情緊張，收工都仲同朱千雪去食自助餐。同許亦妮一樣都係金剛緋聞女友嘅張嘉兒就話兩個同場冇尷尬，仲同記者八金剛係咪追求Mandy Lieu，仲笑話如果佢真係追到就執到寶。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！