立法會主席曾鈺成同佢太太伍嘉敏，偶爾都會喺唔同嘅社團活動中載歌載舞娛賓。呢對政界歌舞夫妻檔，噚日又出動嘞！究竟邊個團體咁大面子，請到佢哋獻技？之咪就係培僑中學畢業典禮囉。
身為培僑中學校監嘅曾鈺成，畀面露兩手就理所當然啦；至於佢太太，同樣係培僑舊同事，難怪有感情，唔會介意賣大包同老公以夫妻檔上陣助慶。
只見噚日喺典禮之上，男嘅大唱《我的驕傲》，女嘅熱情伴舞（圖），落力演出確實博得現場唔少師生掌聲。
之但係呢，亦有在場人士話呀，曾太嘅舞技認真唔錯，但曾鈺成嘅歌藝就……冇佢辯才咁好囉，如果再練習吓會更好喎。