黃色巨鴨Rubber Duck俘虜全港市民歡心，難怪不停被抽水。話說以介紹香港發展同建設為主題，設於中環愛丁堡廣場嘅展城館，早喺好耐之前已經緊貼潮流。
設計師喺「城市印象@你我社區」專題展覽，展出尖沙嘴面貌嘅塑膠積木模型中，刻意加入細版模型Rubber Duck以吸引市民嘅眼球。
結果一如所料，積木巨鴨成為遊人睇展覽時嘅影相熱點；政府新聞網噚日亦不忘抽水，報道呢隻積木鴨有幾咁受市民歡迎，反映香港人呢排「冇鴨不歡」。
八方唔知呢股追鴨熱會幾時冷卻，淨係知道展城館增設咗資源中心同圖書館收藏有關規劃同基建設施嘅書籍同期刊，預計今年夏季就可以啟用嘞。