殿堂級扮嘢大師盧海鵬同詹瑞文嘅《奇幻扮嘢大典》下月中就開騷，前晚阿詹同鵬哥分別扮羅文同米高積遜（Michael Jackson），落旺角行人專用區宣傳，佢哋邊行邊開咪宣傳，又同途人握手，現場有幾個保安維持秩序，玩完就去賣唱攤檔踩場，鵬哥唱羅文嘅名曲《心裏有個謎》同《獅子山下》，阿詹就喺旁邊伴舞。鵬哥嘅表演得到市民嘅熱烈支持，非常受歡迎，踩完場之後，就識做地送番兩張飛畀個檔主。
阿詹晒金底褲
做訪問時，阿詹話嚟旺角踩場，因呢度好多勁人賣藝，順便叫啲粉絲去睇騷，阿詹又話雖然旺角人多，但唔驚俾人抽水：「因為我扮MJ，有條金底褲，冇有怕！」講到嚟緊個騷仲會有乜嘢造型，鵬哥即刻搶答話：「乜都有呀！」阿詹就話會有驚喜造型，而喺騷裏面有好多造型係過咗身嘅朋友，咁有邊啲？例如前晚嘅羅文同MJ造型，阿詹話仲有兩個，大家睇騷就知，佢話會扮個好多新聞嘅天后，咁驚唔驚有啲天后小器唔扮得？阿詹話：「唔怕！嗰個天后唔識講我哋啲話！」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！