過去一周入了兩次戲院，兩次都係臨開場才買票，結果一場撞着差點爆滿，僥倖買到一張最前排左邊的A1門票，對上一次坐着呢個咁正嘅面壁位置，可能已經係80年代放暑假着條短褲仔排隊睇《星球大戰》嗰次，側住個頭回味童年，歷久常新。另一場感受更正斗，因為同小女一大一小竟然兩張飛獨霸全間戲院，兩個大搖大擺坐喺戲院正中間，冷氣好像係涼咗啲，但係套用專家術語，空間感一流。
兩齣戲主角都係人，不過一齣係超越常人嘅Iron Man，另一齣係低過凡人嘅Sugar Man，一齣嘻嘻哈哈一齣𠵱𠵱哦哦，兩齣戲都惹來讚不絕口，不過前者係小朋友居多，後者就主要係有經歷的大朋友。
我好鍾意Iron Man，情況正如我亦喜愛Batman同蜘蛛俠一樣，疾惡如仇，見敵封喉呢啲英雄角色邊位男士唔代入吖，加上Tony Stark仲曉講笑㖭，男女通殺啦，不過這一周最念念不忘的，還是那不知名的Sugar Man，其實佢真名係洛迪古斯，年少時係一個居無定所嘅創作歌手，獨有嘅諷刺社會歌曲加上爵士腔調，大家都以為佢紅硬，結果係兩隻唱碟無人問津然後慘淡離場，有人話佢自殺於台上，有人話佢繼續做工人，去向成謎但冇人介意，直到幾十年後來自南非的「粉絲」發起尋人活動，先發現原來洛迪古斯尚在人間，而佢嘅音樂，原來喺曾經封閉嘅國度裏面成為大熱。
Sugar Man故事之吸引，係因為苦盡甘來，不過亦可能係喺齣紀錄片之中你睇到呢位仁兄嘅淡薄，當佢終於踏上萬人擁戴嘅舞台上，佢仍然冇乜表情，沒有贏波式的舉臂和踏地，歌聲仍然震撼，無論聽眾係多人定少人。我相信佢一定唔鍾意玩facebook，因為佢根本唔在乎有幾多個like。
Iron Man征服世界靠嘅係外殼，Sugar Man呢就靠內在，所謂英雄各有定義，所謂「粉絲」亦各有真偽，香港女子足球隊最近難得連贏兩場，換來掌聲如雷，但在兩場波之前也默默支持佢哋嘅，才是真心like吧。補充一句，那日爆滿那場電影是睇Sugar Man的，而Iron man冇人睇，可能是多得黑雨吧。
keyman
now TV主持
mailto:[email protected]