【中環】周星馳同于文鳳分手後，各行各路，呢對舊情人噚日凌晨竟不約而同去咗中環夜蒲，于文鳳早前被傳跟創興銀行後人廖烈文個仔廖駿倫（又名廖堯城）拍拖，不過噚日凌晨發現佢又換畫，原來新歡係一名「帽」男。
刻意打扮年輕
星爺喺凌晨12點幾單拖由鏞記大廈行出嚟，佢諗住喺門口上司機嘅七人車，點知周五晚太多人封咗路，搞到星爺上唔到車，為避記者急急腳走人。星爺呢頭走咗，佢舊愛于文鳳咁啱就喺老蘭出現，佢獨自行咗去Fly蒲吧，喺門口會合戴鴨舌帽嘅高䠷男子，同埋Cova太子女陳漫桐。帽男年齡打扮明顯細過于文鳳，于文鳳都刻意打扮年輕襯番，帽男見到于文鳳立即變箍頸黨，用強大臂彎搭住佢膊頭，雞啄唔斷，態度親暱，帽男仲為兩女開路，帶佢哋入場狂歡。于文鳳入到場high爆，仲企起身跳舞，之後發現有記者，佢孖住陳漫桐撇甩帽男喺凌晨兩點幾走先。噚日場內仲有曾志偉個仔曾國祥喺吧枱獨飲媾洋妞，金髮黃泆潼喺場外同女伴玩自拍。
採訪、攝影：朱志聰、陳辰、楊浩賢
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！