新昌營造（404）原有業務下，家陣得5倍PE，4.5厘高息，加埋新拓展內房業務，第時業績仲爆炸，抵搞。新昌係老牌建築股，手頭未完成合約，貼近260億銀歷史新高。係冇重大不利情況下，集團已經坐定粒六，繼續keep住呢個低PE及高息回報。又新昌新拓遼寧省鐵嶺內房業，總樓面3,100萬平方呎，地價每方呎56蚊港紙，係鹹豆價，獲利潛力肥仔水。以土地每方呎賺/增值150蚊計，新昌總增值/獲利45億銀，就算連埋呢壇土儲收購所發CB嘅攤薄效應計，新昌每股都可以增值/獲利2.9元，新昌現價幾銀？得1.12元咁大把！又連呢壇重秤計，新昌NAV上到4.97元，大幅折讓77%。折讓係咁意收窄到60%，新昌已經要升80%，到近兩蚊水位。
中天化工大折讓
中國天化工（362）NAV 1.32元，現價（0.28元）嘅折讓，高達79%，即係話，集團現價只得NAV兩折。又中國天化工喺08年金融海嘯期，股價亦講緊1蚊水位，集團現水位，殘到爆。中國天化工由4月底，一路配合成交上嚟，啱啱破咗近三年嘅蟹貨密集區，呢轉短打博升20%，到0.33元，折讓仍然高達75%，安全到痹。
錢雋