有人為劇集收視低迷耿耿於懷，但經歷過四連仆的蔡少芬（Ada），依然可輕鬆面對，皆因在此之前，曾經自滿的她早有過更壞的感受，令她透徹認清自己真正價值所在；如有神助通常發生在錦上添花之時，原來當頭棒喝更見珍貴，正因如此，Ada可更無憂地繼續追求自己所想。
撰文：羅美倫
蔡少芬04年因拍《棟篤神探》，沒有接拍《金枝慾孽》，當時兩劇均叫好叫座，估不到如今Ada終有機會拍《金枝慾孽貳》，卻落得面對收視創黃金時段新低的結局，還被發現她連拍戚其義四部劇，收視都欠理想，Ada不好意思的公開向戚其義講句「是我害了你」。
談到收視欠佳，Ada坦言：「當然預計唔到！大家用心拍，出嚟唔成正比，有份拍梗想有好收視，我會緊張收視，但唔會變成我拍戲嘅目的，阿戚要求好高，由《火舞黃沙》、《珠光寶氣》、《飛女正傳》都冇理收視，因為我鍾意佢嘅嘢，佢會撚到啲唔係我嘅嘢出嚟，有好多挑戰。」Ada欣賞阿戚的創新，甚至不惜冒「冇仔生」之險，接拍《飛女正傳》。
拍劇固然想收視好，以及有機會奪獎，但Ada知道兩者都講天時地利人和，她說：「呢啲可遇不可求，有時觀眾喜歡睇古裝，有時觀眾唔鍾意睇時裝，有時可能某啲因素唔鍾意睇電視，好難講，我唔係唔緊張，但收視理想唔會係我嘅價值，亦唔止關一個演員事，係成部戲嘅事，劇本寫得好，全部新人嘅電影都可以攞獎，亦有部戲演員勁但可能導演拍得唔好、劇本唔好，已經冇人睇，成部戲係team work，紅唔會紅一個演員，會紅晒成部戲，有啲戲可能唔收得，但演員做得好一樣有人讚。」
失落女主角
睇得通、看得淡不是一日可修煉得來，全因Ada早有當頭棒喝的經歷，當年她因接演《棟篤神探》，未有拍《金枝慾孽》，兩劇同期播映皆叫好叫座，《金枝》氣勢如虹，而《棟篤》亦成了當年劇集收視冠軍，可惜那年她到外地傳福音，人人都只討論《金枝》，令她心裏不舒服。
Ada說：「啲人只掛住《金枝》唔記得《棟篤》，我哋當時仲要拍多個黃子華唔死嘅版本安撫觀眾，我問神點解啲人睇《金枝》唔睇《棟篤》？我冇努力過咩？好多疑問，但突然有好大感受，呢個係咪你嘅價值？已定咗你嘅位置？我有能力、有知名度，唔係要標榜自己有幾叻，而係用我嘅知名度帶人認識主，呢個至係我嘅價值，認清咗之後即時覺得好滿足。」
及後在出席無綫台慶頒獎禮，當時Ada信心十足至少必入最佳女主角五強，估不到上天給她開了個玩笑，Ada笑說：「講起都覺得樣衰！我部戲咁犀利，已經冇諗一定攞視后，前五名實有啦，點知第五位叫咗宣萱，我個籮柚原本已經趷起一半，即刻坐番低，子華坐喺隔籬都話：『點會咁㗎！』，但我心入面好感謝主，如果冇之前嘅經歷，我會即刻喊，好感謝神之前已安慰我，畀我知道呢啲嘢唔重要，如冇之前經歷，我未必接受得到，因我係普通人唔係聖人，神令我知道呢樣唔係我價值，唔使靠獎代表我好戲定唔好戲，價值有幾高，自此心態變咗，唔係唔care獎，我係重視，但唔代表我嘅價值，唔會牽住我鼻子走，收視都係一樣。」
阿戚如榴槤
是以面對劇集四連仆，Ada都能處之泰然，她認為最重要是自己在演出上有沒有進步，即使今次《金枝貳》收視不理想，她都不曾懷疑自己，她說：「因我鍾意呢個團隊，對阿戚有信心，佢嘅嘢就好似榴槤咁，鍾意嘅好鍾意，唔鍾意嘅會話屎咁臭，各有所好啦！」
在工作上再冇包袱，Ada更能享受家庭生活，隨着老公張晉憑電影《一代宗師》上位，工作接踵而來，Ada直認比老公更開心：「王家衛喎！國際導演喎！國際影星梁朝偉、章子怡喎！拍到呢啲人已好難得，仲咁多戲做得咁好，我一路以嚟都崇拜佢到頂點，佢好好學，打、做戲都好畀心機，佢內涵比我多，有好多地方值得我學習，佢嘅事業唔係咁多地方俾人發掘到，一發掘到我更癲。男人有事業就畀佢更多肯定，𠵱家有自信，靚仔到不得了，就算喺屋企好烏歪，我都話：『老公，點解你咁靚仔嘅，過嚟咀啖先！』。」老公事業起飛，Ada會平衡家庭、事業比重，享受家庭樂，更加沒包袱去追求自己所想。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！