宅男女神賈曉晨去年遇上力王樊少皇，火速被私有化，JJ日前接受本報專訪，雖未直接把愛的宣言掛唇邊，但全程對男友讚不絕口，嬌滴滴的她還公告要保護力王，展露烈女本色。
現年30歲JJ和即將40歲的樊少皇去年撻着熱戀，辣㷫曾為樊少皇育有一對子女的女友陳少霞，力斥JJ是小三，樊少皇護新歡馬上跟舊愛劃清界線，「J皇戀」愛得癡纏，經歷連番是非，兩人感情打風打唔甩。
結婚要負責任
JJ跟陳百祥的經理人公司約滿後，曾賭氣表示要嫁人，正當外間以為她等升呢樊太，JJ卻臨門say no，經過半月休息，她面對的問題開始陸續想通，馬上拒當人妻。沐浴愛河甜絲絲的JJ說：「我暫時未諗住轉行做人妻，朋友都誤會我會衝動閃婚，不過呢個決定，我一定會三思，結婚要對好多人負責任。」
若JJ一旦決定出嫁，同時意味急於當媽媽，她說：「我一定要籌備一個好環境畀小朋友成長，先至去生，呢幾年仲想喺事業拼搏吓，等將來小朋友可過啲好生活。」JJ已計劃最少生兩個小朋友，希望屋企熱熱鬧鬧。樊少皇當然想早日迎娶愛爆的JJ入門，但她卻皇帝女唔憂嫁，她風騷叫停：「我叫佢唔好求婚住，費事大家尷尬，過多幾年先。」
爆喊狂鬧男友
兩人過去一年拍拖，面對一浪又一浪的閒言閒語，JJ承受很大壓力，她直言：「我曾經諗過自殺，好彩身邊朋友都安慰我，其實有啲嘢我感受到嘅，大家未必睇到，男朋友真係好錫我，佢乜都幫我擋晒。」一對戀人共同度過難關，感情會更邁進一大步，JJ忽然情深對話：「經歷過風風雨雨，我更加覺得自己識到呢個男仔好幸運，之前俾外間圍插，我將好多壓力發洩喺佢身上。」力王變出氣袋？她說：「我冇打佢發洩，但會爆喊，又猛鬧佢係衰人，我嗌住要分手，不停反問自己點解唔放棄。呢啲負面發洩，佢通通啃晒，只係識同我講對唔住。」
力王傾情賣溫柔冧爆JJ，她說：「佢做嘅一切一切，令我感覺好似欠咗佢好多咁，我感動到想保護番佢，佢性格其實單純善良，似小朋友，所有嘢乜都幫我諗先，佢默默承受內心嘅苦，大於一切。」JJ完全接受男友的過去，她說：「外間人唔會理解，佢同前女友嘅嘢，完結咗好耐。」JJ自爆其母由反對變支持，J皇戀又成功爭多一票。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！