世上只有懶女人，沒有醜的女人。現為兩女之母的徐淑敏（Suki），坦言自己也有Baby Fat，曾瘋狂記下食物的卡路里，瘋狂減磅。今次帶這位甜姐兒找她的至愛美食，原來除了愛食海鮮外，她還是「飯桶」一名，為食之餘，不忘分享Keep Fit心得。
記者：何嘉茵 攝影：潘志恆、劉永發
慢煮海鮮 食得又靚又瘦
找出名靚女的Suki講食，來到銅鑼灣的歐陸Fusion餐廳Alba，甫坐下，便問她最喜歡吃甚麼作開場白，沒想到她最愛竟是公認為濕毒的海鮮。「自己無皮膚敏感問題，所以無特別去戒口，我最鍾意食龍蝦、魚等海鮮，嗰種鮮甜味真係好吸引。海鮮蛋白質豐富，我覺得對美肌都有一定幫助，但最緊要係海鮮脂肪含量好低，食得多唔怕肥。」眼前的她身形纖瘦、肌膚白白滑滑，以為她是「食極唔肥」之輩，原來對Keep Fit有一套自家心得，「上鏡唔想有肚腩，瞓前盡量五至八小時唔食嘢，我有一個習慣，做嘢前通常食好少嘢，有時食粒朱古力就算，所以做完嘢就會食到十成飽，哈哈，因為太肚餓啦！」
訪問前已得知Alba的幕後主腦非泛泛之輩，由日籍星級廚師Bryan Nagao坐鎮，他被美國傳媒形容為「北半球最佳東西方混搭摩登亞洲菜演繹者」，亦是日本鐵人料理名廚Roy Yamaguchi的高徒。Suki說：「主廚用咗好多創新健康煮法，將Fusion菜重新演繹，好似澳洲和牛用上Slow cook煮法，食落去味道好濃郁，唔會太油膩，肉質鮮嫩幼滑。出街食飯都想食好啲，一個月大約會嚟一兩次。」慢煮和牛花的工夫絕對不少，先將和牛裝入真空袋抽走空氣，然後以68℃暖水浸足72小時，較煎煮相對輕盈，更能保留食物營養。
同樣以慢煮而成的野生鱒魚是Suki最喜歡的菜式，訪問當天她便興致勃勃，邊做訪問邊食，「西餐一般會用好多Creamy嘅醬汁，但呢度煮法好清新，鱒魚落少少海鹽已經帶出鮮味。」雖然美食當前，她最懷念還是媽媽的菜。「自己好鍾意食住家飯，尤其係媽媽煲嘅靚湯，𠵱家盡量會每個禮拜抽一日帶兩個女返娘家食，自己曾夢想過，如果屋企有一個廚藝了得嘅家廚就好啦。」
Alba（2890 6693）
地址：銅鑼灣開平道1號Cubus10樓
有營菜式 標明卡路里
「除咗海鮮外，我就最鍾意食飯！」菓一道是Suki的外賣飯堂，這裏除了提供白米外，還有不同的有機糙米，包括黑香米、紅米及來自意大利的長糙米選擇。「記得老爺在生時最鍾意煮糙米，廿幾歲女第一次食，質感雖然硬，但澱粉質同糖嘅含量比白飯低好多，最初真係食唔慣，食落覺得身體健康咗，𠵱家都會盡量食糙米，平時就算食外賣，都想一家人食得健康啲。」
此店最大特色是強調天然無添加，菜式無落任何味精雞粉，只用洋葱、蒜及香草等天然食材調味，所有食物都是即叫即煮，更有營養師參與菜式設計。原來無添加理念和負責人Anna有關，她慨嘆：「細個去親飲，食到炸子雞就周身唔舒服，初時以為對炸子雞敏感，後來睇醫生先知我對味精敏感，唔明點解畀錢出街食飯，仲要食啲咁唔健康嘅嘢，講真外面食一碗白粥都有味精。」
除了食得健康外，最吸引Suki是餐牌上標明食物的卡路里，「我細個時係肥妹仔，中六時決心減肥，但自己又懶做運動，惟有從飲食入手。嗰時記晒所有食物嘅卡路里，同學仔都覺得我好癲，慢慢成為一個習慣，𠵱家食飯都會略略計吓一日吸收咗幾多卡路里，暫時唔多餐廳有提供卡路里參考。」
菓一道健康餐廳（2688 2083）
地址：沙田新城市廣場三期1樓A184-A187號舖
