蘋機會：女友6號玩PS　後製捽相

有無試過出外影相，一時不察，將無關人士、雜物攝入相片內？PS高手自然可以在電腦上將佢「執走」，但對一般用家，Panasonic新女友6號（GF6），就更簡單，可以直接在相片執走不想要的部份，同舊女友的合照相，都可以捽一捽，回復單身！
記者：許福合　攝影：蔡家輝

內置WiFi/NFC連線

新GF6仍然沿用M4/3換鏡系統，機身非常小巧，並回復大路設計，有黑、白、啡及紅四色選擇，相信女士們會愛不惜手。
近年自拍風盛，所以GF6亦配備有104萬像素LCD屏幕，拉出屏幕，可以翻轉180゜揭起，鏡頭與屏幕會同時面向用家，而畫面亦會自動反轉，配合一觸即拍功能，在屏幕一篤，即可以校到最靚角度自拍！影了靚相，自然要放上facebook讓朋友品評，GF6內置WiFi及NFC功能，可利用智能手機或平板《Panasonic Image App》遙控拍攝，亦可將相片分享至facebook、Twitter及YouTube等社交網站。

反起屏幕，揀個最靚角度，自拍相自然更合心意。

機身左側是NFC感應器。

機身輕巧，但照玩換鏡。

內置閃燈玩中置式設計。

相片變短片

GF系列的反應速度一向不俗，而GF6的啟動速度更見驚喜，只需0.5秒，現場測試時，更完全感受到對焦時的靈敏度；新機使用Contrast AF，即使用上大光圈，選錯「對焦點」的情況都不算多，另外值得一提是觸控對焦實用性比以往都高，在對焦的反應及精確性都有所提升，真正可以做「見到乜、影乜」！
GF6還提供有特效新玩意，除了將濾鏡加到19種外，最過癮是「清除修片」，拍攝後可以在相機屏幕上，用手指選擇多餘或礙眼的部份，在畫面上捽一捽、馬上變走！這個功能好實用，同舊女友的合照相，都可捽成單人照！另一個好玩效果是「停格動畫」，只要連續拍攝多張連貫相片，GF6可以串連成一條短片，效果有趣。