挾場數2:0領先優勢嘅馬刺，周六作客灰熊（now635台明日9:00am直播），進行NBA季後賽西岸決賽。賽前收到好消息，37歲老將鄧肯繼07年後再度入選今季最佳陣容一隊，亦都係渣巴之後第2老嘅球員獲此榮譽。
NBA周五公佈今季最佳陣容，熱火前鋒勒邦占士、雷霆前鋒杜蘭特、快艇後衞基斯保羅、湖人後衞拜恩全部有份，當中「大帝」更獲全部119張第一選票入圍，拜恩就第11度當選，平咗爵士名宿馬龍紀錄。中鋒位置就鬥得最激烈，馬刺老將鄧肯贏波之餘又贏埋排位，以392分壓過295分嘅灰熊中鋒馬克加素，令後者跌落二隊；鄧肯已經第10次、亦都係繼07年再入選，而且37歲高齡，僅次於當年以38歲入選嘅渣巴，成為聯盟歷來第2老嘅一隊球員。
不過聖安東尼奧當地傳媒報道，鄧肯與01年結婚嘅妻子艾美傳來離婚消息，一個向德州法庭提交的離婚申請資料，同鄧肯兩公婆吻合，唔知會唔會影響鄧肯心情嘞！
馬刺入選二隊嘅控衞柏加，因左小腿傷接受MRI（磁力共振）檢查，事後證實冇大礙，馬刺教練普波域治簡單回應：「佢好好，呢個係季後賽。」馬刺上季西岸決賽，領先雷霆2:0之下，連輸4場出局，「第6人」真路比利就唔希望歷史重演：「只要系列賽未結束，一切只係幻象。」
灰熊與溜馬係目前兩支季後賽主場長勝球隊，灰熊周六返去孟菲斯聯邦快遞球場，教練賀連斯都要諗吓計變陣，包括中鋒馬克加素要多啲中距離投射；馬克加素講：「我會更加進取，向3秒區進攻，亦都希望多打背籃功，但中距離跳射？我需要隊友幫我製造機會。」另外，灰熊防守專家東尼阿倫請纓，責任凍結對手主力柏加，剛度過31歲生日嘅「柏加仔」，兩戰灰熊合共取得17.5分及13.5次助攻，灰熊要贏波就要先守死柏加。