為一份「筍工」，你願意付出幾多？
職位：航空公司高層、跟亞洲最佳CEO共事、年薪六位數字（貨幣不詳）。
條件：學歷經驗不拘、願意上鏡、不怕在全球觀眾面前被人當眾落面、五星期斷六親地獄式生活、過程不可向人透露半句。
風靡全球商場上位真人騷《飛黃騰達》的大鑊鏟，終於炒到來亞洲。被兜口兜面醒一句「You're Fired！」的滋味，香港人有機會試了。
記者、部份攝影：劉嘉蕙
吉隆坡直擊：費爺頂硬上
有留意《飛黃騰達》的觀眾都知道，主持是節目的一大靈魂；要找一位同樣有份量的商界猛人擔任亞洲版主持，製作單位傷盡腦筋。最終當選的商場怪傑、廉航Air Asia CEO費南迪斯，是他們苦纏兩年的成果，「一開始我拒絕㗎！我覺得我唔夠mean，不過製作單位好用心，叫極唔走，仲用番我句口頭禪『We'll never give up』嚟拋我，見佢哋咁堅持，咁惟有頂硬上囉。」音樂工業出身的費南迪斯，會見亞洲區記者談笑自若，soundbite計算準確。製作單位的癡心不無道理。
問香港人誰是費南迪斯，球迷或者講得出是昆士柏流浪班主，但在東南亞以至整個亞洲區，他是超級偶像。像今次12名《飛黃騰達》參加者於吉隆坡現身，就有過半數口口聲聲為費南迪斯而來。費南迪斯最著名事迹，是在短短數年間將蝕錢廉航Air Asia轉虧為盈，造福東南亞地區市民，有機會以平價搭飛機。而新近再讓費南迪斯登上國際新聞的「壯舉」，是為維珍老闆Richard Branson剃腳毛：記得上星期facebook瘋傳的Branson空姐Look嗎？其實幕後黑手正正就是費南迪斯，事緣兩位航空大亨09年以旗下F1車隊輸賭，輸的一方要做對方航空公司空姐一日，訪問時正值「剃腳毛大典」前一晚，費南迪斯笑言心情興奮，「件事最好玩係，我初入行（87年）其實係喺維珍做會計，Richard Branson係我老闆！今日到我治番佢！」
實現12歲童夢
從會計仔到航空大亨，被人揀到揀人，費南迪斯認為爭筍工的要訣，不外乎幾個條件，「誠實、幽默感、對自己負責任、最緊要有熱情。你鍾意一份工自然做得好，就係咁簡單。早兩日先有個有錢佬問我，有冇興趣夾份做水泥生意。我諗，水泥？Cement doesn't excite me!我話唔好意思，水泥or鋼鐵之類我真係冇passion，係好搵錢，but so what？」
在費南迪斯眼中，筍工無捷徑，緣份或者是天注定。他提到兒時一段逸事：原來他12歲就被父母送去英國寄宿學校，喺學校獲分發一個箱，裝晒身家性命財產，這個箱輾轉落入他好友手中。半年前好友把箱寄回，他拆開一段塵封往事──箱上有三張貼紙，「一個係航空公司，因為我鍾意飛機，一直想有一間航空公司；一張係F1賽車，一張係足球隊。」裏面有一堆錄音帶，「早在1977年，我就反對翻版。70年代好興Dup帶㗎，但我收埋所有錄音帶都係正版！」翻開費南迪斯履歷，由華納音樂做到Air Asia，擁有車隊及球隊各一支——12歲的費南迪斯原來早預言了自己的未來。
炒人更爽手
成為亞洲版《飛黃騰達》主持人，電視台Promo日夜轟炸，費南迪斯自言仲未慣被人認得，「一向冇乜人認得我，我冇保鑣冇排場；不過呢排開始食消夜都有人尖叫合照，頭先搭搭吓𨋢，有人大叫我係佢偶像，哈！」Donald Trump以「You're Fired」氣概天下，你可有為自己作句招牌對白?「冇喎，You're Fired已經好直接，好難諗第二句，唔通叫人fxxk off？（眾笑）其實我覺得炒人真係好鬼難，我最出名唔識炒人，我覺得人人都值得有個機會，可以調部門試吓啫。嗯，不過做完呢個節目，我諗我會炒得爽手啲！」第一集剛見街，參加者來自7個國家，未見中國人，有機會添食等香港觀眾玩吓嗎？「我唔知！睇大家反應點。拍電視其實好辛苦，日日八個鐘仲要返工，不過我好開心我有份參與。我希望個節目啟發到年輕人做自己未試過嘅嘢啦。」
東尼費南迪斯（Tony Fernandes）威水史
．現任Air Asia CEO。2001年接手負債纍纍的廉價航空公司Air Asia，短短一年時間，令瀕危航空起死回生，更於09至12年四度獲Skytrax頒發全球最佳廉航。
．92年加入馬來西亞華納音樂，成為公司歷來最年輕董事總經理，99年升任亞洲區副總裁。
．嗜好多多，現任英超球隊昆士柏流浪班主、F1卡達咸車隊班主。
．2010年《福布斯亞洲》年度商人獎。
誠聘：筍工候選人
《飛黃騰達》出名選拔過程嚴謹，單單面試就要過三關：先以短片初試及skype複試選出30名，最後全部召集到吉隆坡進行馬拉松式面試。參賽過程5星期，台前幕後需共同生活並簽足保密協議，所以即使𠵱家已拍完3個月並有晒賽果，大家見記者時都要忍口。
馬拉名人
吉隆坡首映現場，全場記者都將矛頭指向Nazril。原來他是馬來西亞名人，做過電視節目主持，老婆更是當地著名藝人！問Nazril點解參賽攞苦嚟辛，他笑言一切為了費爺，「我想參加名人版，但我知美國名人版《飛黃騰達》要到第9季先有，我等唔切！費南迪斯係我偶像，佢搞廉航就係想幫貧苦大眾。」可有覺得製作單位專登畀個出名靚佬入圍谷收視？「面試時我見到好多靚仔靚女，但我肯定最後入圍都係靠食腦。」
靚仔法男
一出場就令全場女士暈大浪的Alexis，法國人，卻是中國代表，原來Alexis在中國工作七年，操流利國語。「我自細就想參加《飛黃騰達》，試過發夢自己係最後兩強！」自言個性認真的Alexis，花了800歐羅、跑足6個location拍參賽短片；拍攝5星期，一年大假一鋪清袋，今年冇假放，好唔法國人，「我性格係咁，做嘢用200%力。」
前印尼小姐
目辭工、押後婚期。媽媽級印尼代表Dian話五星期拍攝只見過個仔兩次！但現居香港半山做少奶奶的她堅持絕對值得，原來她當選過印尼小姐及印尼太太，讀過美國哈佛大學，更是知名主播，「我覺得我入圍係因為我有代表性。亞洲好多女性，結婚生仔後就只係匿埋喺屋企，我想話畀人知，做人阿媽都可以有自己人生！」
猛料顧問
每輯《飛黃騰達》主持都要找兩位拍檔擔任「魔鬼教練」，費南迪斯就請來同為CEO級人馬的Mark及Kathleen助陣，睇實參賽者有冇偷懶打茅波。
上位真人騷《飛黃騰達》
由《Survivor》金牌監製Mark Burnett製作的《飛黃騰達》（The Apprentice），04年起在美國NBC頻道播放，地產大亨Donald Trump擔任主持。真人騷目的是為Donald挑選一名接班人，勝出者可以得到他旗下公司一年合約，年薪25萬美元。節目中所有參加者會分隊作賽，選出優勝隊伍。而落敗的一隊，會有一名成員被淘汰。《飛黃騰達》推出以來，風靡全球觀眾，各國亦爭相購入版權並製作地區版，而Donald Trump一句「You're Fired！」更成為膾炙人口的口頭禪。
《飛黃騰達》亞洲版
播映時間：
逢周三9:05pm
播映頻道：AXN亞洲頻道
