【銅鑼灣】現年53歲嘅紅姑鍾楚紅唔經唔覺已經守寡7年，直至最近佢先至桃花處處，繼agnès b.亞太及大中華區董事總經理嘅丘家輝食晚飯送花傳緋聞之後，又有陳慧琳（Kelly）男助手Leo呢位緋聞男友2號出現，由此可見紅姑嘅魅力不減當年。
前日6點幾，紅姑司機車住佢同2號緋聞男友Leo去咗銅鑼灣開平道，同行仲有一名女性友人，相信係約咗人食飯。戴住墨鏡嘅紅姑打扮好悠閒，牛仔褲加恤衫，不過佢嘅性感在恤衫背部嘅通花喱士。餐飯食到10點，Leo一馬當先落樓，紅姑就墮後三、四個身位，旁邊仲企住Kelly嘅經理人鍾珍，相信係有人通水話畀紅姑知樓下有記者。
心情靚爆
Leo同紅姑全程保持距離嚟行，不過紅姑心情極靚笑個不停，其間佢被問到係咪帶男朋友見家長時，佢笑得仲犀利，仲講笑話鍾珍係佢嘅家姐，搞到成堆人笑埋一堆。對住記者不停閃燈，紅姑繼續施展佢淘氣可愛一面，做出不同表情。而Leo就一直開路，送咗紅姑同鍾珍落停車場，不過紅姑一直唔肯同Leo合照，猛話「唔使啦」。紅姑上車之後，就突然彎低身喺司機位旁邊摷咗紮花出嚟，唔知係咪就係呢紮花令佢咁開心呢？
直到各人上晒車離開，Leo至自己一個人走。Leo被記者問到係咪同紅姑拍拖時，佢笑晒口話：「梗係唔係啦。」之後會合其他人去坐車。
採訪、攝影：羅德光、徐錦池、梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！