樂隊Mr.出道以來發展算唔錯，年頭仲喺紅館開演唱會㖭，本月15日又去咗澳門孖RubberBand同LMF做騷，唔知係唔係有人眼紅佢哋發展不錯，近日竟然有人爆料話現年33歲嘅主音布志綸（Alan）欠賭債200多萬，又話Alan玩失蹤唔還錢，搞到班債主要去Alan個富家女友Sally嘅父親陳明耀公司追債，又講到似層層連全間公司員工都知道。
作得太大
Alan噚日做完商台活動後被追問欠債傳聞時，佢就輕鬆微笑話：「吓？200萬，冇可能，坦白講多謝讀者睇得起我可以輸200萬，我輸250蚊都肉赤，我唔識賭錢，最多玩吓鋤D，我有200萬都同佢哋夾錢買樓啦。」Tom亦力撐話Alan輸200萬嘅話佢哋就輸1,000萬，而且如果Alan真係輸咁多錢佢哋都唔會放過佢。
至於話追債追到女友爸爸公司，Alan即話：「嘩，呢啲唔知點講，劇情講得好真實，攞嘢嚟講都作得太大，新聞好新鮮。總之我真係冇賭錢，我澄清真係唔識賭錢，而且我哋收入係五個人除開，亦都冇錢買樓。」Alan日前喺澳門做騷之後喺微博留言話：「我不懂賭錢，但確實小賭可以怡情，睡不着拿200元在電子機磨了個幾鐘，冇贏冇輸~哈！」
此外，Mr.噚日接受《好出奇》節目訪問，佢哋話今次想破健力士世界紀錄，搵咗61個人齊齊做一個節目，Mr.話：「好緊張，其實每人時間得20秒介紹到，啲DJ話緊張過頒獎禮。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！